السبت , يونيو 25 2022
الرئيسية / قضايا الحريات / طالب تونسي يستغيث: السفير عاملنا كالكلاب و طلب منا التعامل مع البواب.

طالب تونسي يستغيث: السفير عاملنا كالكلاب و طلب منا التعامل مع البواب.

أنا ياسين خياطي طالب تونسي بموريتانيا متحصل على ليصانص في الفقه و أصوله من المعهد العالي للدراسات و البحوث الإسلامية بموريتانيا سنة 2018.

اليوم مشيت أنا و زميلي أشرف بن جدو لسفارة تونس بنواكشوط باش نقدمو طلب للتسجيل في الماجستير في المعهد العالي للدراسات و البحوث الإسلامية في نواكشوط قابلنا المسؤول على الشؤون القنصلية قاللنا أنا مش مسؤول عليها بروا للبواب اعطوه ملفاتكم و هو تو يدخلهم للسفير .

كلمنا البواب باش يعطينا ديشارج قال السفير منع علينا نعطو ديشارج قلنالو شوفلنا نقابلوه مشى البواب حكى مع السكرتيرة قالتله قلهم يعطوك الدوسيات مشالها و رجعلنا قاللنا راو السفير رافض يتعامل مع وزارة الشؤون الإسلامية اللي هي مسؤولة على المعهد العالي للدراسات و البحوث الإسلامية .

مشكلتنا كالآتي: 1- بأي حق السفير يرفض يعطي ديشارج على ملفات تتعطاله و كان تضيع ملفاتنا أو ينكر أنا عطيناه ملفات كفاش نقلتو حقوقنا؟

2- بأي حق السفير يرفض التعامل مع وزارة الشؤون الإسلامية مع العلم أننا سألنا الوزارة في موريتانيا و قالولنا التعاون بين وزارة الشؤون الاسلامية الموريتانية و سفارة تونس ما انقطعش .

فهل سفير تونس مخول ليه يقطع العلاقات كيف ما يحب ووقت ما يحب و يضيع مصالح الطلاب في التسجيل علما و انو التعليم العالي في مجال العلوم الإسلامية ما فيه حتى جامعة تتبع وزارة التعليم العالي بل الكلها تتبع وزارة الشؤون الإسلامية و شهادتها معترف بيها في تونس .

هل هو تصرف فردي من السفير راجع لتوجهات اديولوجية معادية لكل ما هو إسلامي

3- بأي حق السفير يرفض مقابلتنا و حاشاك عاملنا كالكلاب و مكلف بواب سنغالي يتعامل معانا البرة من الباب؟ ياخي نحن توانسة و إلا لا؟ ما عندناش حقوق ؟

إن شاء الله تعاونونا على حل مشكلتنا و تبلغوا أصواتنا و بارك الله فيكم

ياسين الخياطي طالب تونسي بموريتانيا

تعليق واحد

  1. توفيق الفقير

    أنا لما كنت في موريتانيا السفير التونسي قال لي تركت الزيتونة وأتيت تدرس في الوهابية ؟!! ودعاني لترك الدراسة الشرعية ووعدني أن يجد لي عمل إذا ٱنقطعت عن الدراسة !
    قدمت أوراقي لتجديد جواز السفر لعله سنة 2006 فلم أحصل عليه إلا بعد قيام الثورة المباركة 2011 !!!
    تونس بلد الظلم

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *